Batonye: Se kiyès?
Avoka: Se mwen menm Baton, youn nan konfrè w yo.
Batonye: Fòk ou ta pale vit wi paske m pa gen tan kote m ye a.
Avoka: Mwen rele w paske mwen pa wè w depi de mwa.
Batonye: Kote m ye a, okenn konfrè pap ka wè m ankò.
Avoka: Pou kisa Baton, e tout bèl pwogram ou te genyen pou egzekite yo ?
Batonye: M regrèt konfrè, Mwen pap ka egzekite yo ankò paske pouvwa gentan ekzekite m !
Avoka: Non, Mèt Dorval, ou paka fè nou sa, nou te twò kwè nan ou!
Batonye: Malgre bòn volonte m, mwen pap kapab ankò.
Avoka: Pou kisa? Anpil avoka, jèn tankou ansyen nan pwofesyon an, nou tout te pare pou n te travay avèk ou.
Batonye: Konfrè m, sa ki te rive m nan dat 28 dawout a bloke m nan tout sa m te vle fè pou Bawo a avèk Peyi a.
Avoka: Baton, ou pa la, men genyen yon lòt Batonye nan tèt Konsèy la pou kontinye egzekite pwogram ou yo e pou ede w jwenn jistis.
Clique sur ce lien si toi aussi tu veux publier ton article sur haititchala.com : InfoPUBLICATION
Batonye: Ede m jwenn jistis? M pa kwè!
Avoka: Pou kisa ou pa kwè?
Batonye: Pouvwa te egzekite: Mèt Mireille Durocher Bertin, Yves Volèl, Pè Joseph Simoly; okenn nan yo pat jwenn jistis, ou kwè ke se mwen ki ta vinn jwenn jistis?
Avoka: M kwè wap jwenn jistis paske ou te pwofesè, avoka epi Batonye!
Batonye: Konfrè, poze w non! Konnen ou pa konnen kiyès yo rele avoka Bawo pòtoprens.
Avoka: Kiyès yo rele, Batonye!
Batonye: Anpil nan avoka Bawo a, se gran van tilapli yo ye. Yo avèk ou, lè sa cho; kou sa frèt, yo bay vag. Epi, ou konnen gen anpil nan yo ki genyen ti enterè pèsonèl yo yap defann nan Pouvwa a, se patatis yo ye.
Avoka: Pou kisa ou pale konsènan enterè pèsonèl ?
Batonye: Anpil nan yo gen pòs nan Pouvwa a, yo pa vle pran pozisyon piblik nan dosye m nan pou patwon an pa revoke yo. Gade pou wè si map jwenn jistis !
Avoka: Nou menm nan Bawo a, nou di ke fòk gen yon egzanp ki trase nan dosye w la; fwa sa a, pap gen lankèt sepouswi; nou di non, pap gen sa pyès!
Batonye: Kite m ri! Pi fò avoka nan Bawo a, se aloral yo ye wi. Gade pou wè, wap banm rezon, dosye m nan ap fini menm jan avèk lòt yo: nan tiwa Kabinè Lenstriksyon ki ap kase fèy kouvri sa jiskas ke tout moun rive bliye m.
Avoka: Ki dènye mo w, Batonye Dorval?
Batonye: M pa regrèt nan vi m ke mwen te toujou ap swiv tras papa m avèk manman m: onè, diyite e respè. M te toujou di sa m panse lib e libè; Monferrier DORVAL pat janm mare nan pye tab: ni PHTK, ni Opozisyon an, ale wè pou l ta bezwen pòs avèk privilèj. Pou sa yo ekzekite m nan, map di e map di l ankò: " Peyi a pap ni dirije, ni administre".
Jacques MÉRÉUS, avocat et ancien diplômé de L'ENS, Section: Lettres Modernes.
Articles recommendés :
Clique sur ce lien si toi aussi tu veux publier ton article sur haititchala.com : InfoPUBLICATION
--
VWA TOUT MOUN KONTE !Restons connectés
.png)
.png)
Commentaires
Publier un commentaire